Irwanda

Tanzaniya:Icyamamare muri muzika Vanesa Mdee akurikiranyweho gucuruza ibiyobyabwenge







Umuhanzi ukomeye muri Afurika y’Uburasirazuba Vanessa Mdee yatawe muri yombi na Polisi yo muri Tanzania aho akurikiranyweho ibyaha birimo gucuruza no gukwirakwiza ibiyobyabwenge.


Polisi yo mu Mujyi wa Dar es Salaam yatangarije ikinyamakuru Daily News ko yafashe are Vanessa Mdee[wamamaye nka Vee Money] kuko agaragara ku rutonde rw’abashakishwa n’inzego zishinzwe umutekano bacuruza ibiyobyabwenge, by’umwihariko we akekwaho no kubikoresha.


Umuvugizi wa Vanessa Mdee , Aman Tenga yabwiye iki kinyamakuru ko uyu muhanzi ari we wafashe icyemezo cyo kwijyana ku cyicaro gikuru cya polisi i Dar es Salaam nyuma y’uko yamenyeshejwe ko ari ku rutonde rw’abakekwaho gucuruza no gukoresha ibiyobyabwenge muri iki gihugu.


Aman Tenga yemeje ko Polisi ya Tanzania yari imaze iminsi ishakisha Vanessa Mdee ndetse yanaje kumushaka mu rugo rwe aho atuye mu gace ka Kunduchi mbere y’uko yishyikiriza inzego z’umutekano. Uyu mukobwa yafunzwe nyuma y’uko yari amaze iminsi mike muri Afurika y’Epfo mu kazi.


Mu kwezi gushize Umuyobozi w’Intara ya Dar es Salaam, Paul Makonda yatangaje urutonde rurerure rw’abantu bacuruza ibiyobyabwenge muri Tanzania, mu bo yavuze harimo ibyamamare nka Dogo Hamidu, Diamond Platnumz, Khalid Mohamed (TID), umunyamakuru uzwi cyane ukorera Clouds TV Babuu wa Kitaa, Halidali Kavila, Amani, Kashozi Miss Wema Sepetu wanafunzwe ariko aza kurekurwa n’Umucuruzi ukomeye Omry Sanga.


Umuririmbyi Diamond Platnumz ari mu bahanzi bashakishwa ndetse bivugwa ko ashobora gufungwa bidatinze, hari amakuru acaracara muri Tanzania yemeza ko uyu mugabo wa Zari yamaze gushyikirizwa impapuro zimuhamagaza mu nzego zishinzwe iperereza gusa ntaritaba.


Vanessa Mdee yavutse ku itariki ya 7 Kamena 1988 mu Mujyi wa Arusha mu majyaruguru ya Tanzania. Yaherukaga kuza mu Rwanda mu Ukuboza 2015 aho yanakoreye igitaramo.

Mu mabyiruka ye yagize amahirwe yo kuba mu bihugu bitandukanye kubera se wari umunyapolitiki ndetse byanamufashije kumenya indimi n’umuco wa henshi ku Isi.


Umuhanzi Vanessa Mdee azwi mu ndirimbo zakunzwe mu Karere nka ‘Nobody But Me’ yakoranye na K.O, ‘Siri’, ‘Never Ever’ n’izindi.

Vanessa akunze kwiyita Vee Money ni umuhanzi ariko wanamenyekanaye cyane cyane muri Tanzania nk’umunyamakuru. By’umwihariko kuri Televiziyo ya MTV (Mlimani TV) y’i Dar es Salaam.

Mu mwuga we w’itangazamakuru yakoranye ibiganiro n’ibihangage muri muzika nka Trey Songz, Rick Ross, Ludacris, Miguel, French Montana, K’Naan, Kelly Rowland, Mac Miller, Donald, Nazizi, Xtatic, Stella Mwangi, Camp Mulla, Tay Grin, Teargas, Dr. Sid n’abandi .


Nk’uko urubuga rwa Wikipedia rubigaragaza, Vanessa Mdee yinjiye mu muziki mu 2012 ariko mbere yaho yari yaragiye akora indirimbo gusa ntizamenyekanye cyane.
Mu ntangiriro za 2013 nibwo yakoranye na Ommy Dimpoz indirimbo bise ‘Me and You’ yamufashije kugaragaza ubuhanga bwe muri muzika ndetse muri uwo mwaka yegukanyemo ibihembo byinshi harimo bibiri yahawe na Tanzania Music Awards.


Nubwo Vanessa Mdee akora akazi k’itangazamakuru ndetse akaba n’umuhanzi, mu mashuri yisumbuye yize ibijyanye n’amategeko muri Kaminuza ya Catholic University of Eastern Africa muri Kenya gusa ntiyigeze akora akazi kajyanye nabyo.


Vanessa Mdee amaze kwegukana ibihembo umunani bikomeye muri muzika, zimwe mu ndirimbo ze zabimuhesheje harimo ‘Me and You’ yakoranye na Ommy Dimpoz, ‘Closer’, ndetse na ‘Hawajui’.




268 Views

Kwamamaza

Sponsored Content

Tip! #RW

Julia Mukankusi and we others DotRW offering Web Hosting, VPS, Domain Name, Premium SEO, link building, web development and AdWords. Learn more about our services .

IBITEKEREZO

TANGA IGITEKEREZO

AMAZINA
E-MAIL
ANDIKA ICYO UTEKEREZA KURI IYI NKURU


#Amakuru #Hanze #Imikino #PaulKagame

Sponsored Content